रत्नागिरी- मुंबई-गोवा महामार्गावर सातत्याने गॅस टँकरचे अपघात घडत आहेत. गेल्या दोन-तीन महिन्यात असे अपघात घडले आहेत. हातखंबा येथे रात्री ११ च्या सुमारास हा मोठा अपघात घडला आहे. या घटनेत गॅसचा टँकर थेट पुलावरून कोसळल्याने मुंबई-गोवा महामार्गावरील वाहतूक ठप्प झाली आहे या अपघाताचे वृत्त कळताच पोलीस प्रशासन व सुरक्षा यंत्रणांनी घटनास्थळी धाव घेऊन आवश्यक त्या उपाययोजना तात्काळ सुरू केल्या आहेत. याचाच भाग म्हणून काही नागरिकांनाही सुरक्षिततेसाठी स्थलांतरित करण्यात आले आहे.
मुंबई-गोवा महामार्गावरून जाणार गॅस टँकर रत्नागिरीतील हातखंबा येथील शाळेजवळ पुलावरून खाली कोसळला. ही घटना सोमवारी रात्री 11.15 च्या सुमारास घडल्याची माहिती समोर येत आहे. गॅस लिकेज झाल्याची प्राथमिक माहिती असून स्फोटाचा धोका असल्याने त्याठिकाणी सतर्कता बाळगली जात आहे. यंत्रणा कार्यान्वित झाल्या आहेत. खबरदारी म्हणून मुंबई गोवा महामार्गावरील दोन्ही बाजूची वाहतूक बंद केली गेली आहे. नागरिकांनी या परिसरात न जाण्याचे आवाहन करण्यात आले आहे. तसेच वाहतूकीसाठी पर्यायी मार्गाचा वापर करण्याचे आवाहनही केले गेले आहे.
दरम्यान महामार्गावर पलटी झालेल्या टँकरप्रकरणी एक मोठी अपडेट समोर येत आहे. टँकरमधून लिकेज होणारा गॅस हा थांबवण्यात जिल्हा प्रशासन व पोलीस प्रशासनाला मोठ यश आल आहे. मात्र या पलटी झालेल्या टँकरमधून गॅस रिकामा करण्याची प्रक्रिया सुरू आहे. त्यामुळे महामार्गावरील वाहतूक अद्यापही बंद राहणार आहे. हा गॅस टँकर रत्नागिरी कडून गोव्याच्या दिशेने निघाला होता त्याच वेळी रस्त्याचा अंदाज न आल्याने अवघड वळणावर हा अपघात झाल्याचा प्राथमिक अंदाज आहे. सुरक्षेचा उपाय म्हणून 30 ते 40 घरातील नागरिकांना आजूबाजूच्या हॉटेल मध्ये तसेच निवळीपर्यंत हलवण्यात आल्याची माहिती आहे.
घटनेचे तात्काळ गांभीर्य लक्षात घेऊन जिल्हा पोलीस अधीक्षक नितीन बगाटे हे पोलिस यंत्रणा व सुरक्षा यंत्रणेचा फौज फाटा घेऊन घटनास्थळी दाखल झाले. महामार्गावर वाहतूक पूर्णपणे थांबवण्यात आली असून ती पर्यायी मार्गाने वळवण्यात आली आहे. टँकर मधील लिकेज होत असलेला गॅसच्या ठिकाणी पाण्याचा मारा करण्यासाठी तीन ते चार बंब घटनास्थळी दाखल झाले. यामध्ये नगरपरिषद व एमआयडीसीच्या अग्निशमन दलाचे बंबही दाखल झाले. जिल्हा पोलीस अधीक्षक नितीन बगाटे यांच्या समवेत अपर जिल्हा पोलीस अधीक्षक बाबुराव महामुनी, स्थानिक गुन्हा अन्वेषण शाखेचे नितीन ढेरे, रत्नागिरी शहर व रत्नागिरी ग्रामीणचे पोलीस ठाण्याचे अधिकारी व कर्मचारी तसेच अन्य सुरक्षा यंत्रणा घटनास्थळी तैनात आहेत.
