- चिपळूण – वनविभागाच्या कंपाउंड वॉलवर चक्क भारतीय जनता पक्षाचे चिन्ह कमळ चित्र काढल्याने आता चिपळूण नवा वाद निर्माण झाला आहे. शासकीय मालमत्तेवर राजकीय पक्षाचे चिन्ह लावणे नियमबाह्य असल्याचा आरोप करत आक्रमक झालेल्या काँग्रेस पक्षाच्या पदाधिकाऱ्यांनी ‘फॉरेस्ट’च्या अधिकाऱ्यांना जाब विचारत त्याच्यावर प्रश्नांचा भडीमार केला. तर राजकीय पक्षाचे चिन्ह तात्काळ हटवावे, अशी मागणी देखील काँग्रेसच्या उत्तर रत्नागिरी जिल्हाध्यक्षा सोनललक्ष्मी घाग यांनी निवेदनाद्वारे केली आहे.
काही दिवसांपूर्वी पेठमाप येथील विकासकामाच्या भूमिपूजन फलकावर भाजप जिल्हाध्यक्षांचे नाव समाविष्ट करण्यात आले होते. काँग्रेसच्या जिल्हाध्यक्षा सोनललक्ष्मी घाग, नगरसेवक साजिद सरगुरोह यांच्यासह पदाधिकाऱ्यांनी यावर जोरदार आक्षेप घेतल्याने या फलकाचा मुद्दा चांगलाच गाजला होता. हे प्रकरण शांत होते नाही तोच भाजपच्या पक्ष चिन्हावरून आता नव्या वादाला तोंड फुटले आहे.
चिपळूण शहरातील मार्कंडी येथे वन विभागाचे विभागीय कार्यालय आहे. या कार्यालय परिसराभोवती नव्याने कंपाउंड वॉल उभारण्यात आली आहे. मुख्य रस्त्याच्या बाजूने या कंपाउंड वॉलवर काही भाजपच्या कार्यकर्त्यांनी बेधडकपणे आपल्या पक्षाचे चिन्ह रेखाटून त्यावर रंगरंगोटी केली. या बाबतच्या एक व्हिडिओ देखील सोशल मीडियावर व्हायरल झाला आहे. या पार्श्वभूमीवर काँग्रेस नगरसेवक गटनेते साजिद सरगुरोह, नगरसेविका सफा गोटे आणि सुरेश पाथरे यांनी संबंधित फॉरेस्ट विभागाच्या अधिकाऱ्यांची भेट घेत जाब विचारला. शासकीय मालमत्तेवर कोणत्याही राजकीय पक्षाचे चिन्ह लावणे नियमबाह्य असल्याचे सांगत, “सरकारी जागेचा राजकीय वापर कसा काय केला जातो?” असा सवाल काँग्रेस पदाधिकाऱ्यांनी उपस्थित केला. यासंदर्भात जिल्हाध्यक्षा सोनललक्ष्मी घाग व पदाधिकाऱ्यांनी थेट वन विभागावर धडक देत निवेदन दिले. या निवेदनात नमूद केले आहे की, चिपळूण येथील वन विभागाच्या शासकीय मालमत्तेच्या भिंतीवर एका राजकीय पक्षाचे चिन्ह लावण्यात आल्याची बाब निदर्शनास आली आहे. शासकीय मालमत्ता ही सार्वजनिक असून तिचा कोणत्याही राजकीय पक्षाच्या प्रचारासाठी किंवा प्रतीकात्मक वापरासाठी उपयोग करणे नियमबाह्य व अयोग्य आहे. या प्रकारामुळे प्रशासनाच्या निष्पक्षतेवर प्रश्नचिन्ह निर्माण होत असून नागरिकांमध्ये संभ्रमाचे वातावरण तयार झाले आहे. शासनाच्या मालकीच्या जागेवर कोणत्याही राजकीय पक्षाचे चिन्ह, फलक किंवा प्रचार साहित्य लावणे हे संबंधित नियम व आचारसंहितेच्या विरोधात आहे. त्यामुळे सदर राजकीय चिन्ह तात्काळ हटविण्यात यावे. या प्रकाराची सखोल चौकशी करण्यात यावी. जबाबदार व्यक्ती अथवा घटकांवर योग्य ती प्रशासकीय कारवाई करण्यात यावी. भविष्यात अशा प्रकारची पुनरावृत्ती होऊ नये यासाठी आवश्यक ती खबरदारी घ्यावी. या प्रकरणाची गांभीर्याने दखल घेऊन त्वरित कार्यवाही करावी, अशी मागणी करण्यात आली आहे.
