रत्नागिरी – आपल्या मतदारसंघात विविध कामांच्या कार्यक्रमाला निमंत्रण न देता सुनील तटकरेंकडून परस्पर उद्घाटनं केली जात आहेत. कोणत्याही कार्यक्रमाचे निमंत्रण दिले जात नसल्याचं सांगत शिवसेनेचे आमदार योगेश कदम यांनी राष्ट्रवादीचे खासदार सुनील तटकरें विरोधात हक्कभंग दाखल केला. त्यावर आता सुनील तटकरेंनीही प्रतिक्रिया दिली. माझ्यामुळे राज्यातल्या सरकारमध्ये समज- गैरसमज जाऊ नये म्हणून माझ्याविरोधात दाखल झालेला हक्कभंग स्वीकृत करावा, अशी विनंती मी विधानसभा अध्यक्ष नाना पटोले यांना करणार आहे. घटनेनुसार खासदार म्हणून मला बैठक बोलावता येते का हेही तपासावे, महाविकास आघाडीचं सरकार टिकावं म्हणून माझ्यावर कारवाई करावी, अशी भूमिका सुनील तटकरेंनी घेतली आहे.
12 ऑक्टोबरला तटकरे यांच्या उपस्थितीत कार्यक्रम एक कार्यक्रम झाला होता. त्यानंतर शिवसेनेनं तटकरेंविरोधात जोरदार मोर्चेबांधणी केली आहे. खासदार सुनील तटकरे यांच्या उद्घाटनाच्या फोटोनंतर सेना आणि राष्ट्रवादीमध्ये शीतयुद्ध रंगलंय. रायगड लोकसभा मतदारसंघाचे खासदार सुनील तटकरे हे दापोली विधानसभा मतदारसंघात होणार्‍या विकासकामांच्या भूमिपूजनाला आपणास निमंत्रण देत नाहीत. तसेच आपल्याला विश्‍वासात न घेता कार्यक्रम करत असल्याने दापोली विधानसभा मतदारसंघाचे आमदार योगेश कदम यांनी खासदार सुनील तटकरे यांच्या विरोधात हक्कभंगाचा प्रस्ताव विधानसभा अध्यक्षांकडे दिलाय. त्यामुळे आता महाविकास आघाडीत काही आलबेल नसल्याचे चित्र पाहायला मिळतंय.
