चिपळूण – बदलत्या तंत्रज्ञानाच्या युगात विद्यार्थ्यांनी पारंपरिक शिक्षणासोबत डिजिटल कौशल्ये, कृत्रिम बुद्धिमत्ता (AI) आणि रोजगाराभिमुख कौशल्ये आत्मसात करणे आवश्यक आहे, असे प्रतिपादन कार्यक्रमाच्या प्रमुख अतिथी चिपळूण नगरपरिषदेच्या उपनगराध्यक्षा रुपाली दांडेकर यांनी केले.
युनिटेक कॉम्प्युटर एज्युकेशन सेंटरच्या वतीने एमएस-सीआयटी व शैक्षणिक प्रमाणपत्र वितरण, फॅशन डिझायनिंग विद्यार्थिनींचा सत्कार तसेच विद्यार्थी सत्कार समारंभ आयोजित करण्यात आला होता. यावेळी दांडेकर बोलत होत्या. विद्यार्थ्यांनी युनिटेकच्या विविध अभ्यासक्रमांचा लाभ घेऊन बदलत्या रोजगार क्षेत्रासाठी स्वतःला तयार करावे, असे आवाहन त्यांनी केले.
युनिटेकच्या माध्यमातून संगणक व डिजिटल शिक्षणासोबत फॅशन डिझायनिंग, पॅरामेडिकल आणि विविध कौशल्याधारित अभ्यासक्रम उपलब्ध करून दिले जात असल्याचे सांगून दांडेकर यांनी प्रा. जहूर बोट व त्यांचे ज्येष्ठ बंधू शब्बीर बोट यांच्या दूरदृष्टीचे कौतुक केले.
कार्यक्रमास डी.बी.जे. कॉलेजचे ग्रंथपाल डॉ. एस. पी. मोरे, प्रा. शिवगण आणि विज्ञान शिक्षक पराग कदम यांची प्रमुख उपस्थित होती. मान्यवरांनी AI, कौशल्यविकास व भविष्यातील रोजगाराच्या संधींबाबत विद्यार्थ्यांना मार्गदर्शन केले.
यावेळी एमएस-सीआयटी व विविध अभ्यासक्रम पूर्ण केलेल्या विद्यार्थ्यांना प्रमाणपत्रांचे वितरण करण्यात आले. तसेच फॅशन डिझायनिंग विद्यार्थिनींचा सत्कार करण्यात आला.
कार्यक्रमाच्या यशस्वी आयोजनासाठी युनिटेकचे संचालक प्रा. जहूर बोट, समन्वयक पल्लवी ताठरे व संपूर्ण स्टाफने विशेष परिश्रम घेतले. प्रा. जहूर बोट यांनी उपस्थित मान्यवर, विद्यार्थी व पालकांचे आभार मानले.
